इटहरी : भदौ २४ गतेको जेनजी आन्दोलनमा आगलागी र तोडफोड भएको नेपालीरिका होटेलले आइपिओ खुलाउने भएको छ । लक्ष्मी सनराइज क्यापिटल लिमिटेडसँग सम्झौता गर्दै ५० लाख कित्ता सेयर निष्कासन गर्ने तयारी गरेको हो । 
नेपालीरिका होटेल लिमिटेडका अध्यक्ष भोलेश्वर दुलाल तथा लक्ष्मी सनराइज क्यापिटल लिमिटेडका सिइओ विजयलाल श्रेष्ठबिच सम्झौता पत्रमा हस्ताक्षर भएको छ । मोरङको विराट चोक र दमकमा रहेका दुई होटेल कोरोना १९ को महामारीका बिच सञ्चालनमा आएका थिए । 
पूर्वी नेपालको हस्पिटालिटी क्षेत्रमा नयाँ सुरुवात गरेको नेपालीरिका २ अर्बको लगानीमा सञ्चालनमा आएको हो । यसअघि इटहरीको गरिमा होटेल (सोल्टी वेस्टेण्ड)ले पनि आइपिओ खुलाउने तयारी गरिसकेको छ ।