धरान : धरानमा भएको आगजनी तोडफोड लगायतका घटना जेनजीले नगरेको धरान जेनजी आन्दोलन अगुवा नविन राईले आफ्नो फेसबुकमा सार्वजनिक गरेका छन् ।
उनले मङ्गलवार राती फेसबुकमा स्ट्याटस लेखेका छन् ‘जेनजीलाई बदनाम गराउन चाहनेहरूले धरानमा आगलागी गरेका हुन सक्छन् तर हामीले धरानमा आगलागी गरेका छैनौँ ।’ उनले कसैलाई आगो लगाउने निर्देशन पनि नदिएको बताएका छन् ।
जेनजीको कार्यक्रम ४ बजेर ३० मिनेटमा नै सकिएको उल्लेख गर्दै ‘हामी हिंसाको विरुद्धमा छौँ, धरानमा आगजनी जेनजीहरुबाट भएको होइन । हाम्रो कार्यक्रम ४ः३० बजे नै सक्किएको हो ।’ उनको पोष्टमा भनिएको छ ।
धरानमा मङ्गलवार साँझको समयपछि आगालागिका घटनाहरू भएका हुन । साँझ एमाले नेतृ पुर्वउपमेयर मञ्जु भण्डारी सुवेदी, पुर्वमेयर मनोजकुमार मेन्याङ्बोको घरमा एक समूहले तोडफोड गरेका थिए ।
उनीहरूले घरभित्रको सामानहरू सडकमा निकालेर जलाए । पुर्वप्रतिनिधिसभा सदस्य, एमाले नेता जयकुमार राई, काँग्रेस नेताद्वय उमेश थापा र सुजेन्द्र गोले तामाङको घरमा पनि तोडफोड गरेका छन् ।
वडा १७ का अध्यक्ष मनोज भट्टराईको घरमा तोडफोड गर्ने उद्देश्यले पुगेका समूहलाई स्थानीयले प्रतिकार गरेर भगाएका थिए । पुर्वमेयर तिलक राईको घरबाट स्थानीय र काँग्रेस, एमालेका युवाहरूको समूहले प्रतिकार गरेपछि अराजक समूहले पछि हटेको थियो ।
भाटभटेनी सुपर मार्केटमा पनि समूहले तोडफोड, लुटपाट र आगजनी गरेको छ । स्थानीय राजनीतिक दलका युवाहरू र धरानको दमकलले आगो निभाउने प्रयत्न गरे पनि आज बुधवार बिहान सम्म पनि भाटभटेनी भवनमा धुवाँ आइरहेको थियो ।
प्रत्यक्षदर्शीहरूका अनुसार सामानहरू लुटपाट भएको छ । कतिपय सडकमा निकालेर जलाइएको छ । तोडफोड र आगजनीका घटनाहरू भइरहँदा कहीँ पनि सुरक्षाकर्मीहरूको उपस्थिति थिएन ।