धरान : कार्यवाहक प्रधानमन्त्री प्रकाशमान सिंहले बाढी पहिरोका कारण अवरुद्ध ८ सडक तत्काल खुलाएर आवतजावत सुचारु गर्न गृह मन्त्रालयको विपद् पूर्वतयारी प्रतिकार्य शाखालाई निर्देशन दिएका छन् ।

शाखाले वर्षाका कारण अवरुद्ध सडकहरूको विवरण आज आइतबार कार्यवाहक प्रधानमन्त्री सिंहलाई जानकारी गराएको थियो । कार्यवाहक प्रधानमन्त्री सिंहको अध्यक्षतामा बसेको बैठकमा सडक अवरुद्ध हुँदा नागरिकलाई समस्या हुने बताउँदै तत्कालै समस्या समाधान गर्नुपर्ने बताए ।

बैठकमा विपद् पूर्वतयारी प्रतिकार्य शाखाले कार्यवाहक प्रधानमन्त्री सिंहलाई अवरुद्ध सडकहरूबारे जानकारी दिएको थियो ।

शाखाको सूची अनुसार बाढी पहिरोबाट हाल पासाङ ल्हामु राजमार्ग अन्तर्गत रसुवा गोसाइकुण्ड-२ टिमुरे, अरनिको राजमार्गको भोटेकोशी-२ कोदारी र घट्टेखोला, बेनिजोमसोम सडक खण्डको रघुगंगाको दुई खोलीमा सडक अवरुद्ध छ ।

त्यस्तै, घोराही थवाङ सहिद मार्गको त्रिवेणी गाउँपालिका, भेरी कोरिडोरको त्रिपुरासुन्दरी नगरपालिका छलघाट,कर्णाली राजमार्गको शुभकालिन गाउँपालिका र भेरी कोरिडोरको आठ विसकोट नगरपालिकामा सडक अवरुद्ध छ ।

कार्यवाहक प्रधानमन्त्री सिंहले विपद् सम्बन्धी पूर्व सतर्कताका लागि यसअघि म्यासेज पठाउने गरिएकोमा अव देखि भ्वइस कल पनि गर्ने व्यवस्था गर्न आवश्यक व्यवस्था मिलाउन निर्देशन दिएका छन् ।