धरान : नेपालको यातायात व्यवसायीमा नीजिक्षेत्रको लगानी विस्तार गराउन सङ्गठनको भूमिका निर्वाह गरेका अग्रज व्यवसायी हिरा उदासको ८२ वर्षको उमेरमा शनिवार दुःखद निधन भएको छ ।
नेपालमा सडक यातायात सीमित भएको अवस्थामा ५० वर्ष अघि धरानलाई पूर्वको यातायात व्यवसाय कम्पनीहरूको केन्द्र बनाउनुमा उनी सहित अगुवा व्यवसायीहरूले ठुलो भूमिका खेलेका थिए । यातायात क्षेत्रमा निजी क्षेत्रको अर्बौको लगानी प्रोत्साहित गर्नुमा पनि उनको प्रेरक भूमिका थियो ।
सरकारको यातायात नीति, कानुनका ज्ञाता हिरा उदासले नेपालको यातायात क्षेत्रमा भएको निजी लगानीको सुरक्षाका लागि सरकारी हस्तक्षेप, विदेशी लगानीप्रति उनले सधैँ व्यवसायीहरूलाई सचेत र सङ्गठित बनाउने कार्य गर्दै आएका थिए ।
नेपाल यातायात व्यवसायी राष्ट्रिय महासङ्घका कोशी प्रदेश संयोजक सरोज श्रेष्ठले अग्रज व्यवसायी उदासको निधनले यातायात व्यवसायको क्षेत्रमा अपूरणि क्षति भएको बताएका छन् ।
 उनले भने ‘उहाँको निधनले निजी क्षेत्रका यातायात व्यवसायीहरूले संरक्षक, अभिभावक र मार्गदर्शक गुमाएका छन् ।’ दिवङ्गत उदास महासङ्घको पूर्व केन्द्रीय अध्यक्ष थिए ।
फोक्सो लगायतका बिरामी उनलाई पछिल्लो पटक उपचारका लागि विराटनगर स्थित विराट टिचिङ अस्पताल लगिएको थियो । उपचारकै क्रममा उनको निधन भएको पारिवारिक श्रोतले जनाएको छ ।