धरानः धरान रङ्गशालामा जारी २६ ओैं बुढासुब्बा गोल्ड कप फुटबलको सोमबार भएको क्वाटर फाइनलमा आयोजक धरान फुटबल क्लबलाई टाई ब्रेकरमा ५–४ गोलले पराजित गर्दै लालीगुराँस फुटबल क्लब पोखरा सेमिफाइनलमा प्रवेश गरेको छ।
अत्यन्तै प्रतिस्पर्धात्मक खेलमा लालीगुराँस पोखराले उत्कृष्ट डिफेन्स प्रदर्शन गर्दै आयोजक धरानलाई स्तब्ध बनाउने जित निकालेको हो।
आयोजक धरान फुटबल क्लब बुढासुब्बा गोल्डकपको पाँच पटकको उपविजेता समेत हो। निर्धारित ९० मिनेटको खेलमा दुवै टोलीबाट कुनै पनि गोल हुन नसकेपछि खेल अतिरिक्त १५ मिनेट (एक्स्ट्रा टाइम) मा प्रवेश गरेको थियो। अतिरिक्त समयमा पनि गोल हुन नसकेपछि खेलको निर्णय टाई ब्रेकरमा मार्फत गरिएको थियो।
टाईब्रेकरमा लालीगुराँस पोखराका तर्फबाट राम थापा,टिकाराज गुरुङ,सुदिप गुरुङ,अब्दुल युसुफ र आशिष् गुरुङले गोल गर्दै टिमलाई सेमिफाइनलमा पुर्‍याए।
धरान फुटबल क्लबका तर्फबाट विवेक राई,सविन राई,प्रज्वल थापा र नगेन राई ले गोल गरे भने दोर्जे तामाङको प्रहार विफल भयो। घरेलु समर्थकको ठुलो साथ पाउँदा पनि आयोजक धरान गोल गर्न नसक्दा प्रतियोगिताबाट बाहिरिन बाध्य भएको छ।
घरेलु खेलाडीका कारण धरान क्लबले दर्शकको ठुलो माया पाएको थियो। खेलको म्यान अफ द म्याच लालीगुराँस फुटबल क्लबका गोलकिपर कुम्बा देउवा घोषित भए। उनले नगद १० हजार रुपैयाँ, ट्रफी र प्रमाणपत्र प्राप्त गरे।
लालीगुराँस पोखराको यो जितसँगै प्रतियोगिताको सेमिफाइनल समीकरण थप रोचक बनेको छ। लालीगुराँस पोखरा पहिलो पटक बुढासुब्बा गोल्डकपमा सहभागी भएको क्लब हो। बुढासुब्बा गोल्डकपको विजेताले नगद १० लाख रुपैयाँ र उपविजेताले नगद ५ लाख रुपैयाँ पुरस्कार प्राप्त गर्नेछन्।
भोलीको खेल झापा–११ झापा र सातदोबाटो यूथ क्लब काठमाडौँ बिच हुने भएको आयोजकले जानकारी दिएको छ। सातदोबाटो यूथ क्लब पहिलो पटक धरान आएको हो।