धरान : बिपी कोइराला स्वास्थ्य विज्ञान प्रतिष्ठानलाई पेष्ट प्रो सोलुसन प्रालिले करिब ४८ लाख रुपैयाँ बराबरका आवश्यक मेडिकल सामग्री हस्तान्तरण गरेको छ ।
आर्थिक सङ्कटबाट गुज्रिरहेको प्रतिष्ठानलाई आर्थिक तथा भौतिक सहयोग गर्न उपकुलपति प्राडा बिक्रमप्रसाद श्रेष्ठले आह्वान गरेपछि उक्त प्रालिले सहयोग गरेको हो ।
प्रतिष्ठानका अनुसार उपकुलपति श्रेष्ठको आह्वानपछि सहयोग गर्ने दातामध्ये पेष्ट प्रो सोलुसन प्रालि अहिलेसम्मकै सबैभन्दा बढी मूल्यको सहयोग गर्ने संस्था बनेको छ ।
सोमबार आयोजित एक कार्यक्रममार्फत प्रालिकी प्रोप्राइटर सुप्रिया माझी वनेपाली र उनका श्रीमान् दीपक वनेपालीले उपकुलपति श्रेष्ठलाई सामग्री हस्तान्तरण गरेका थिए ।
प्रालिका अनुसार कुल ४७ लाख ८८ हजार ७ सय रुपैयाँ बराबरका सामग्री प्रतिष्ठानलाई उपलब्ध गराइएको छ । उपकुलपति श्रेष्ठले दाता दम्पतीलाई धन्यवाद दिँदै अहिलेसम्मकै ठुलो सहयोग भएको बताए ।
उनले आफूले प्रतिष्ठानको जिम्मेवारी सम्हाल्दा संस्था चरम आर्थिक सङ्कटमा रहेको र अझै पनि सङ्कटकै अवस्थामा रहेको उल्लेख गरे ।
‘त्यसैले बिपीलाई बनाउन भित्रका मानिस मात्र होइन, बाहिरका व्यक्तिहरूले पनि सहयोग गर्नुपर्छ भन्ने सोचका साथ नगरवासीसँग आह्वान गरेका छौँ ,’ उनले भने, ‘हामीले धेरै सहयोग पाइरहेका छौँ ।आज प्राप्त यी सबै सामग्री तुरुन्तै प्रयोगमा आउनेछन् ।आजसम्मकै सबैभन्दा ठुलो सहयोग भएकाले हामी अत्यन्त खुशी र आभारी छौँ ।’
प्रतिष्ठानका अनुसार विभिन्न शाखाबाट पटक–पटक माग भए पनि बोलपत्र गर्न नसक्दा आवश्यक सामग्री खरिदमा समस्या भइरहेको थियो ।
‘यी सामग्री अत्यन्त उपयोगी छन् । जति सामग्री प्राप्त भएका छन्, ती सबै तुरुन्तै प्रयोगमा आउनेछन् । आगामी दिनमा पनि सहयोगको अपेक्षा गरेका छौँ,’ इलेक्ट्रोमेड शाखा प्रमुख राहुल मिश्रले बताए ।
प्रोप्राइटर दीपक वनेपालीले प्रतिष्ठानलाई पुरानै अवस्थामा फर्काउने अभियानमा साथ दिन सहयोग गरेको बताए ।
‘बिपीलाई चाहिने सामग्री हामीसँग उपलब्ध थियो । बनेपालीले भने ‘उपकुलपति श्रेष्ठ ज्युले भ्रष्टाचार हुन नदिने र प्रतिष्ठानलाई पुरानै अवस्थामा फर्काउने अभियान सुरु गरेर सहयोगको आह्वान गर्नुभएपछि साथ दिनुपर्छ भन्ने लागेर सहयोग गरेका हौँ ।,’
