झापा : झापाको बुद्ध शान्ति गाउँपालिका १ बुधवारे बजार स्थितमा करुवा प्रहार गरी श्रीमतीको हत्या गर्ने श्रीमानलाई प्रहरीले पक्राउ गरेको छ । पक्राउ पर्नेमा ३२ वर्षीय रघुनाथ मारुती गोरड रहेका छन् । आज बिहान ३ बजे गोरडले सामान्य वादविवादको क्रममा २६ वर्षीय श्रीमती सपना गोरडलाई पानी खाने करुवाले टाउकोमा प्रहार गरेका थिए ।  
करुवा प्रहारबाट श्रीमतीको घटनास्थलमै मृत्यु भएको प्रहरीले जानकारी दिएको छ । तत्काल घटनाको जानकारी प्राप्त हुनासाथ इलाका प्रहरी कार्यालय बुधबारेबाट खटिएको प्रहरी टोलीले करुवा प्रहार गर्ने गोरडलाई घटनास्थलबाट नै पक्राउ गरेको हो ।  
पक्राउ परेका गोरडको इलाका प्रहरी कार्यालय धुलाबारीबाट थप अनुसन्धान भइरहेको जिल्ला प्रहरी कार्यालय झापाले जनाएको छ । गोरड भारतको महाराष्ट्र घर भई बुधबारे बजारमा सुन पसल सञ्चालन गरी बस्दै आएका थिए ।