_1749430366.gif)
धरान : जेनजी आन्दोलनको नाममा भदौ २४ गते धरानमा गरिएको तोडफोड र आगजनीमा नेकपा माओवादी केन्द्रको धरान-१४ पेरिस खोल्सी स्थित कार्यालयमा सटर फुटाएर आगजनी गर्ने अराजक समूहको ३ जनाको नाम पार्टीले सार्वजनिक गरेको छ ।
माओवादी पार्टीद्वारा आज मङ्गलवार जारी विज्ञप्तिमा नेपाल कम्युनिष्ट पार्टी (माओवादी) धरान उपमहानगर समितिको कार्यालयमा आगजनी तथा तोडफोडको आपराधिक घट्नाप्रति गम्भीर ध्यानाकर्षण भएको उल्लेख गर्दै अगुवाहरूको नाम सार्वजनिक गरिएको हो ।
विज्ञप्तिमा भनिएको छ ‘सो घट्नामा प्रत्यक्ष संलग्न व्यक्तिहरू मनुराज राई, दिपचन्द्र राई (कान्छी) र मिलन बान्तवा राई लगायतको संलग्नता देखिन्छ ।’
माओवादी पार्टी कानुनको शासन, लोकतान्त्रिक आचरण र सामाजिक उत्तर दायित्वमा दृढ प्रतिबद्ध रहेको उल्लेख गर्दै विज्ञप्तिमा शान्ति सुरक्षा कायम गर्न तथा यस्ता आपराधिक गतिविधिको पुनरावृत्ति रोक्न दोषीहरूलाई छिटो भन्दा छिटो आवश्यक कानुनी कारबाही गर्न सम्बन्धित निकायको ध्यानाकर्षण गराउँछौँ भनी विज्ञप्तिमा भनिएको छ ।
