_1749430366.gif)
धरान : आज शुक्रवार देखी सोमवार असोज २० गते सम्म मध्यम देखी भारी वर्षाको सम्भावना रहेकोले अत्यावश्यक नभई सकेसम्म घरदेखि टाढा र रातीको समयमा यात्रा नगर्न/नगराउन सुनसरी जिल्ला प्रशासन कार्यालयले आज सार्वजनिक सूचना जारी गरेको छ ।
जल तथा मौसम विभागले उक्त समयमा वर्षाका कारण विपद् परिस्थितिको सामना गर्नुपर्ने अवस्था आइपर्न सक्ने पूर्वानुमान गरेको आधारमा उक्त सूचना जारी गरेको जनाइएको छ ।
सूचनामा सुनसरी जिल्ला अन्तर्गत बग्ने कोशी नदीमा समेत पानीको बहाव चतरा तथा आसपास पुग्न सक्ने देखिएकोले कोशी नदी सहित ससाना खोलाहरूमा समेत आकस्मिक बाढीको सम्भावना उच्च रहेकोले सतर्कता अपनाउन र पूर्वतयारी कार्य गर्न आग्रह गरिएको छ ।
उक्त अवधिमा सुनसरी जिल्लाबाट सञ्चालन हुने रात्रिकालीन यात्रुवाहक सवारी साधनहरू सञ्चालन नगर्न नगराउन सूचित गरिएका छ । पहिरोका जोखिम रहेका तथा नदी खोला किनारका बस्तीहरूमा उच्च सतर्कता अपनाउन आग्रह गरिएको छ ।
कोशी नदीमा चतराबाट सञ्चालन गरिने मोटरबोटहरु बाढीको जोखिम कम नभएसम्म सञ्चालन नगर्न नगराउन सूचित गरिएको छ । जोखिमयुक्त राजमार्ग र सडकहरूमा तुरुन्त परिचालन हुनेगरी डोजर, एक्स्काभेटर, लोडर लगायतका साधनहरू तयारी अवस्थामा राख्न सम्बन्धित निकायहरूलाई सूचित गरिएको छ ।
