धरान : ब्राण्डको नाम ‘गंगा जल’ सुन्दा विशुद्ध धार्मिक जल जस्तो लाग्ने शिलबन्द ड्रिङकिङ्ग वाटरको प्लास्टिकको बोतलमा बाहिरबाटै फोहोरको किरा देखिने पानी बजारमा विक्री वितरण भइरहेको अवस्थामा फेला परेको छ ।
‘पिउने पानी’ वर्गको मिनरल वाटरको बोतलमा शिलबन्द पानीको प्याकिङ इटहरी-२ स्थित गौमुखी गंगाजल प्रा.ली.ले गरेको हो ।
कम्पनीले बाहिरबाटै फोहोरको किरा देखिने पानी बजारमा बिक्री वितरणका लागि पठाएको पाइएको छ।
शिलबन्द पानी भित्र आईतबार बोतलको पानी भित्र फोहोरको किरा भेटिएको हो ।
धरान-२० चिण्डेडाँडाका युवराज तामाङले घरायसी प्रयोगका लागि एक हप्ता अघि पानी खरिद गरेका थिए ।
कार्टुनबाट बोतल झिकेर पानी प्रयोग गर्न खोज्दा बाहिरबाटै किरा देखिएकोले शिलबन्द नतोडी राखेको उनले बताए ।
उनले भने‘गंगा जलले गुणस्तरहीन पानी बेचेर उपभोक्ताको स्वास्थ्यमा गम्भीर खेलबाड गरेको छ ।’ 
गंगा जल पानी उत्पादक कम्पनीमा फोन सम्पर्क गर्दा नाम बताउन नचाहने एक कर्मचारीले ‘बाई मिस्टेक’ १/२ वटा पानीमा त्यस्तो हुन सक्ने बताए । उनले भने ‘तपाईको मिडियालाई कस्ले भयो ? मैले त कसैलाई नभन्नु भनेको थिए त ?’ भन्दै फोन काटिदिए ।
धरानमा शिलप्याक बोतलमा बाहिरबाटै फोहोरको किरा देखिने पानी खुल्ला विक्री वितरण भैरहेका घट्नाले दैनिक उपभोग्य वस्तुको बजार अनुगमन, मूल्य नियन्त्रणको अवस्था कस्तो छ भन्ने उदाङ्गो बनाएको छ ।