धरान : श्रम संस्कृति पार्कमा रिपोर्टिङ गर्न पुगेका पत्रकारहरूसँग आफूबाट दुर्व्यवहार भएकोमा श्रम संस्कृति पार्ककी कर्मचारी अस्मीता चाम्लिङ राईले माफी मागेकी छन् ।
कपुरी न्युजकी पत्रकार रश्मी प्रधान, कोले न्युजका पत्रकार रोहित राई, कोशीपत्र दैनिकका फणीन्द्र तिम्सिनाको मानहानी हुने अपशब्द र फेसबुकमा स्ट्याटस र भिडियो राख्दा गम्भीर दुर्व्यवहार भएकोमा शुक्रवार धरान उपमहानगरपालिका परिसरमा माफी मागेकी हुन ।
अस्मिता राईले फेसबुकमा लेखेको उक्त स्ट्याटस डिलिट गरी भिडियो शेयर गर्ने श्रम संस्कृति पार्टी, हर्क साम्पाङ ए रिभुलेसन, ज्ञानु चाम्लिङ, निमा पोङसुवालाई भिडियो डिलिट गराउने सर्तमा माफी मागेकी हुन ।
उनले फेसबुकमा स्टाट्स लेख्दै ‘नमस्कार म अस्मिता राई धरान उपमहानगरपालिकाको कर्मचारी २०८२ माघ २८ गते कपुरी न्युजको पत्रकार रश्मी प्रधानसँग परिचय पत्र देखाउनु भन्ने कुरामा चर्का चर्की परेकोमा मैले भिडियो बनाएको थिएँ ।
उक्त भिडियो सार्वजनिक भएको हुँदा वहाँको मानहानि भएको कारण र मैले कर्मचारीको स्थानमा रहेर यो काम गर्न नहुने रहेछ भनेर आफ्नो गल्ती महसुस गरेर वहाँसँग माफी माग्दै सम्पूर्ण सामाजिक सञ्जाल प्रयोगकर्ताहरूमा म आग्रह गर्न चाहन्छु जति पनि पोस्टहरू छन्, कृपया हटाई दिनुहुन अनुरोध गर्दछु ।
आज उप्रान्त चरित्र हत्या हुने कुनै पनि खालको कमेन्टहरू नलेख्दिनु होला हामी दुई बिच छलफलमा बसी विवाद अन्त्य गर्दै आज उप्रान्त कुनै पनि सेवाग्राहीलाई मानहानि हुने काम गर्ने छैन भनी क्षमा माग्न चाहन्छु भन्दै स्ट्याटस लेखेकी छिन ।
उनले माघ २८ गते फेसबुकमा राईको मानहानी हुने गरी स्ट्याटस लेखेको थिइन । स्ट्याटस लेखेको पछि पत्रकारहरूले धरान उपमहानगरपालिका राजश्व महाशाखा प्रमुख खगेन्द्र खतिवडालाई उजुरी दिँदै कडा कारबाही माग राखेका थिए ।
छलफलमा उपमहानगरपालिका राजश्व महाशाखाका प्रमुख खतिवडा, कार्यवाहक प्रमुखका सचिवालय खेम रनपहेली, वरिष्ठ पत्रकार हर्ष सुब्बा, नेपाल पत्रकार महासङ्घ सुनसरी निवर्तमान अध्यक्ष जनकऋषि राई, कपुरीन्यूज सञ्चालक मात्रिका प्रसाद नेपाल, पार्क इन्चार्ज रिमा गुरुङ लगायतको उपस्थिति थियो ।
