_1749430366.gif)
इटहरी : बालबालिकाको रुचिले भविष्य निर्धारण गर्छ भन्ने मान्यतालाई पछ्याउँदै राष्ट्रिय मावि आइडल आयोजना भयो । गायन, नृत्य र साहित्य तीन विधामा विद्यार्थीले प्रस्तुति दिए । प्रत्येक विधामा विजयी भएका र नभएका सबैलाई राष्ट्रिय माविले कलामा निखरता ल्याउने वातावरण बनाएको छ । पाठ्यक्रमको अध्ययन सँगै क्षमता अभिवृद्धिमा विद्यालयले लगानी बढाएको हो । अभिभावक सँगको नियमित संवाद र सरोकारवाला सँगको सहकार्यमा विद्यालय उत्कृष्टताको उचाइमा अगाडी बढिरहेको छ ।
भलिबल, फुटबल, क्रिकेट लगायत खेलकुदका विधाहरूमा समेत विद्यालयले सक्रियता देखाएको छ । २०८३ को शैक्षिक सत्रबाट खेलमैदानको स्तरोन्नति गर्ने र विद्यालयलाई पढ्ने/पढाउने मात्र हैन सिक्ने र सिकाउने थलोको रूपमा विकास गराइने भएको छ । पाठ्यक्रम बाहेक धेरै कुरा सिक्नुपर्ने आवश्यकता रहेकाले सोही अनुसार गतिविधि गरिरहेको बताउँछन् प्रधानाध्यापक सरन बस्नेत ।
बस्नेत २०६० सालमा राष्ट्रिय माविमा प्रवेश गरेका हुन् । त्यसबेला जम्मा ८ कक्षा सम्म पढाइ राष्ट्रिय मावि इटहरीमा सरस्वती सतन पछि खुलेको दोस्रो विद्यालय हो । विगत स्मरण गर्दै उनले भने, ‘झ्याल बिनाका खुल्ला कोठाहरू थिए । डेस्क बेन्च पनि थिएनन् । भवन एकदमै असुरक्षित । पूर्वाधार बनाउन असम्भव जस्तो अवस्था थियो । २०१३ सालमा खुलेको विद्यालयमा ६० सालसम्म माध्यमिक तहमा पुग्न सकेको थिएन । त्यो अवस्थाबाट यो अवस्थामा आउन धेरै मेहनत गर्नुपरेको छ ।’
त्यही बिचमा नेपाल ग्रामीण पुनर्निर्माण संस्था (आरआरएन)ले केही लाख पैसा दिएपछि नयाँ भवन निर्माण सुरु भयो । आँपगाछी चोकमै रहेको असुरक्षित भवन भत्काएर नयाँ विद्यालय बनाउने काममा तत्कालीन अध्यक्ष बोधराज बजगाईँले अग्रसरता लिए । स्थानीय १५१ जना नागरिकले भवन बनाउन सहयोग पुर्याए । हाइटेन्सन लाइन विस्तारले विद्यालयलाई असर परेपछि विद्युत् प्राधिकरणले ५ लाख क्षतिपूर्ति दियो । त्यही पैसाले निम्न माविबाट माध्यमिक तहमा पुर्याउन २ लाख धरौटी राखियो ।
माध्यमिक तहको पढाई सुरु भएपनि विद्यार्थी पाउन गाह्रो हुने अवस्था आयो । इटहरीको जनता माविले समेत राष्ट्रिय माविबाट गएका विद्यार्थीलाई स्वीकार नगर्ने अवस्था थियो । राष्ट्रिय माविका विद्यार्थी कमजोर भएपछि अन्य विद्यालयले भर्ना नलिने गरेको अनुभव प्रधानाध्यापक बस्नेतले सुनाए ।
माध्यमिक तहमा पढाई सुरु हुन थालेपछि बाहिरका शिक्षकहरू आए । जिल्ला बाहिरबाट पनि शिक्षकहरू आउन थालेपछि विद्यालय थप चलायमान भयो । केही नयाँ सुरुवात गर्न व्यवस्थापन समिति र शिक्षकहरू बिचमा तारतम्य मिल्यो । जसले विद्यालयलाई केही वर्षमै धेरै सुधार गरायो ।
प्रगतिको गति यति बढ्यो कि २०६५ सालको एसएलसी परीक्षामा पहिलो पटक उच्च श्रेणी (डिस्टीङ्सन) ल्यायो । प्रतीक खतिवडा र दुर्गाप्रसाद निरौला दुई विद्यार्थीले पाएको नतिजाले इटहरी मात्र हैन सुनसरीमै चर्चा कमायो । त्यसपछि एकै पटक विद्यालयको प्रभाव र प्रचार बढ्यो । २०६७ सालमा पनि ५ जनाले उच्च श्रेणी प्राप्त गरे । केही वर्षमै राष्ट्रिय मावि उत्कृष्ट विद्यालयको रूपमा परिचित भयो।
तत्कालीन प्रधानाध्यापक लोकेन्द्र काफ्लेको समन्वयात्मक भूमिकाले विद्यालयको वृत्ति विकासमा खास योगदान पुर्यायो । २०७३ सालमा ज्ञानबहादुर विश्वकर्मा अध्यक्ष भए । उनी पूर्व गाविस सचिव समेत रहेकाले श्रोतको व्यवस्थापनमा केही बुझेका थिए । सोही वर्षमा फाल्गुन देखि टोल विकास सँग समन्वय गरेर विद्यार्थी ल्याउने प्रस्ताव ल्याए । टोलमा शिक्षक प्रतिनिधि पठाएर अभिभावक भेला गर्न थाले ।
मुख्य राजमार्गमै विद्यालय भएकाले दुर्घटनाको जोखिमको कारण विद्यार्थी नपठाएको अभिभावकले सुनाए । अङ्ग्रेजी माध्यमबाट पढाउने र गाडीको व्यवस्था भएपछि विद्यार्थी आउने बुझेका विश्वकर्माले सोही अनुसार रणनीति बनाए । केही समयमै इटहरीमा पहिलो पटक गाडीको सुविधा भएको पहिलो सरकारी विद्यालय बन्यो राष्ट्रिय मावि ।
गाडी सुविधाबापत अभिभावकबाट महिनाको ३ सय रुपैयाँ लिन थालियो । सिटिइभिटीको प्राविधिक शिक्षा कार्यक्रममा जोडिएकाले विद्यालयको श्रोत बढ्यो । जसले बस खरिदमा सहयोग पुर्यायो । पछि सरकारले १ प्रतिशत ब्याजदरमा बस दिएपछि थप बसको सेवा विस्तार गरेपनि अझै अपुग रहेको बस्नेतको भनाइ छ । अङ्ग्रेजी माध्यमबाट पढाई सुरु भएपछि विद्यार्थीको चाप बढ्दै गएको उनी बताउँछन् । पहिला विद्यार्थी खोज्दै हिँडेको विद्यालय अहिले कक्षा कोठा अभाव झेलीरहेको छ ।
