_1749430366.gif)
धरान : लिम्बू जातिको प्रमुख सांस्कृतिक बाजा सहितको नृत्य च्याब्रुङ नाचको शिप र शैली नयाँ युवा पुस्तालाई हस्तान्तरण गर्न धरानमा मेन्याङवो कल्याणकारी सङ्घले प्रशिक्षण दिएको छ ।
मौलिक सांस्कृतिक परम्पराको निरन्तरता र संरक्षणका लागि सङ्घ केन्द्रीय समितिले १०० जना लिम्बू युवालाई समावेश गरी प्रशिक्षण दिइएको हो । उनिहरुलई च्याब्रुङ नाचसँगै यसको इतिहास र मुन्धुमको बारेमा पनि जानकारी दिइएको छ ।
सङ्घका अध्यक्ष नवीन मेन्याङवोका अनुसार लिम्बू जातिको कला, संस्कृति र परम्पराको संरक्षण संरक्षण, प्रवर्द्धन र पुस्तान्तरण गर्न १० दिने च्याब्रुङ नाच प्रशिक्षण आयोजना गरिएको हो । प्रशिक्षण शनिवार सम्पन्न भएको छ ।
उनले भने ‘युवा पुस्तामा सांस्कृतिक चेतना बढाएर मात्र संस्कृति जोगाउन सकिन्छ हामी त्यही अभियानमा छौँ ।’ प्रशिक्षणमा अन्य जिल्ला सहित धरानका ४० जना सहभागी थिए । कार्यक्रमलाई धरान-१५ वडा कार्यालयले १ लाख आर्थिक सहयोग गरेको उनले बताए ।
प्रशिक्षणले धरानमा हुने सभा-सम्मेलनमा च्याब्रुङ नृत्यका लागि हुने माग हुने गरेको हुनाले यसलाई व्यवसायीक बनाउन सकिने भएको उनले बताए । कला र संस्कृतिको संरक्षण र विकासमा लाग्दा आम्दानी पनि हुने भएकाले त्यसतर्फ युवा पुस्ता आकर्षित भएको अध्यक्ष मेन्याङवोको भनाई छ ।
उनीहरूलाई प्रशिक्षक गोपुलाल फेम्साङ लिवाङले प्रशिक्षण दिएका थिए । समापनमा प्रमुख अतिथि धरान-१५ का वडाध्यक्ष नरेश ईवरामले संस्कार संस्कृति बाचे जाती बाच्ने भएकाले युवा पुस्ताहरूमा कला संस्कृति हस्तान्तरण गर्नुपर्ने बताए ।
