धरान : बिपी प्रतिष्ठानको आकस्मिक बाहेकका सबै स्वास्थ्योपचार सेवा सोमवार देखी ठप्प भएको छ ।
नेपाल चिकित्सक सङ्घको आन्दोलनमा ऐक्यबद्धता जनाउँदै बिपीका सेवाहरू बन्द गरिएको हो ।
बिपी प्रतिष्ठानका सहप्रवत्ता अभिजित सिंहद्वारा विज्ञप्ती गर्दै आन्दोलनका कारण देशका सम्पूर्ण अस्पताल,मेडिकल तथा डेन्टल कलेज, नर्सिङहोम, क्लिनिक लगायतका सबै स्वास्थ्य संस्थाहरुमा आकस्मिक बाहेकका बन्द रहेको जनाएको छ ।
बिरामीको उपचारमा लापरबाही गरेको भन्दै उपभोक्ता अदालतले केही दिनअघि मात्रै ग्रान्डी अस्पताल र चिकित्सकमाथि ५७ लाख १९ हजार रुपया क्षतिपूर्ति सहित कारबाहीको फैसला गरेकोमा चिकित्सकहरू आन्दोलित भएका हुन । 
संघव्दारा जारी प्रेस विज्ञप्तिमा चिकित्सकीय सेवा कुनै उपभोक्ता वस्तु नभएको र उपचारमा देखिने जटिलता वा प्रतिकूल असरका लागि चिकित्सकलाई मात्र दोषी ठहर्‍याएर कारबाही गर्नु न्यायसङ्गत नभएको उल्लेख छ ।