_1749430366.gif)
धरान :धरानका स्कुले विद्यार्थीहरू भानुचौकमा सडक नाटक, गीति नाटक प्रदर्शन गर्दै लागूपदार्थ दुर्व्यसन विरुद्ध युवा जागरण प्रदर्शन गरेका छन् ।
परिवर्तन संघव्दारा आयोजित प्रदर्शनमा कक्षा ८ देखि १० सम्मका विद्यार्थी सहभागी थिए । उनीहरूले भानुचोकमा सडक नाटक, गीति नाटक लगायत सिर्जनात्मक प्रस्तुतबाट स्कुले विद्यार्थी युवाहरू लागु औषध दुर्व्यसनमा फस्ने गरेका घटना प्रदर्शन गर्दै सचेतनामूलक सन्देश दिए ।
सडक नाटकमा लागूपदार्थको असर र बाबुआमाले छोराछोरीको भविष्यका लागि गरेको दुःख कष्ट जीवन्त रूपमा प्रस्तुत गरेका थिए भने दुर्व्यसन सम्बन्धी नृत्य प्रस्तुत गरे ।
यसअघि ‘ड्रग्स विरुद्ध आफै लड्नुस्’ मूल नाराका साथ बृहत् विद्यार्थी र्यालीले बजार परिक्रमा गरेको थियो । धरान १२ पब्लिक स्कुल देखि सुरु भएको र्याली भानुचोकमा सभामा परिणत भएको हो ।
र्यालीमा धरानका विद्यार्थीहरूले प्लेकार्डमा ‘से नो टु ड्रग्स, आमाको सङ्गत गरे तिमी पनि असल बन्छौँ, दुर्व्यसनले लिन्छ ज्यान, आजैबाट दुर्व्यसन त्यागौँ, दुर्व्यसन मुक्त हौँ जस्ता प्लेट बोकेर सहभागी भएका थिए ।
सभामा उपमहानगरपालिकाका उपप्रमुख अईन्द्र विक्रम बेघाले लागूपदार्थ दुर्व्यसनले धरानलाई कुरूप बनाएको बताए । व्यक्तिहरूले सञ्चालन गरेका सुधार गृह महँगो भएकोले उपमहानगरपालिकाले आफै सुधार गृह सञ्चालन गर्ने तयारी गरेको बताए ।
सङ्घका अध्यक्ष ओसन राई सागरले लागूपदार्थ सेवनले आफ्नो जीवनमा आई परेका भोगाई र लागु औषध सेवनले बाबु आमा गुमाएको जीवनी प्रस्तुत गरे ।
प्रमुख अतिथिको रूपमा बोलाइएका कोशी प्रदेशका सामाजिक विकास मन्त्री पाँच कर्ण राई उपस्थित भएनन् । कार्यक्रममा धरान २० का वडाध्यक्ष पदम बहादुर लिम्बु, वडा १० का अध्यक्ष विवेक राई, वडा ११ का अध्यक्ष लोकेन्द्र फागो लगायतका शिक्षक, विद्यार्थीको बाक्ले उपस्थिति थियो ।
