धरान : १० औँ धरान रन नेवा: च्यारेटी १० के रन व्यवस्थित रूपमा सम्पन्न गर्न नगरपालिका, सुरक्षा निकायहरू र आयोजक सबैले आ-आफ्नो ठाउँबाट लागि पर्ने प्रतिबद्धता जनाएका छन। 
शुक्रवार मेयर तिलक राईको अध्यक्षतामा इलाका प्रहरी कार्यालय, जिल्ला ट्राफिक प्रहरी कार्यालय, सशस्त्र प्रहरी बल, नगर प्रहरी र धरान रन समूहका प्रतिनिधिसहित बसेको छलफलले यस्तो प्रतिबद्धता जनाएको हो । छलफलमा आयोजक धरान रन समूहले हालसम्मको तयारी र दौडको रुटको बारेमा जानकारी गराएको थियो । १० औँ धरान रन नेवा च्यारिटी १० किमी-२०७८ भोलि (शनिवार) आयोजना हुँदैछ । धरान रनमा पहिलो पटक ह्वील चियर रेस हुने भएको छ । शनिवार बिहान ६ बजेर ४५ मिनेटमा ह्वील चियर रेस सुरु गरिने धरान रन समूहका अध्यक्ष रमु राईले छलफलमा जानकारी गराए ।
उनका अनुसार ह्वील चियर रेस भानु चौकबाट पुतली लाइनको पुलसम्म हुनेछ । त्यसपछि साढे ७ बजे १६ वर्ष उमेर समूहदेखि माथिका मेन ईभेन्ट (१० किमी रन) हुनेछन् । मेन ईभेन्ट सुरु भएको १० मिनेटपछि १२ वर्ष मुनिका बालबालिकाहरू दौड हुनेछ । उनीहरूले भानु चौकदेखि दुर्गा चौकसम्म दौडिएर पुनः फर्किने धरान रन समूहका अध्यक्ष राईले बताए । छलफलमा आयोजकले ४ वटा एम्बुलेन्स, दुई वटा स्वीपर बस र २५० भन्दा बढी भोलेन्टियर खट्ने पनि जानकारी गराए । 
मेयर राईले १० औँ धरान रन सफल बनाउन नगरपालिका र सुरक्षा निकायहरूले महत्त्वपूर्ण भूमिका निर्वाह गर्ने पनि प्रतिबद्धता व्यक्त गरे । भोलि बिहान भानु चौकबाट सुरु भई पुतली लाइन, दुर्गा चौक, बुद्ध चौक, रत्न चौक, मङ्गलवारे, कल्याण चौक, पानी टङ्की, गणेशमान चौक, रङ्गशाला हुँदै जिरो प्वाइन्ट, अमरहाट, रेडक्रस भवन, हात्तीसार, विजयपुर चौक, पिण्डेश्वर मन्दिर, चिनियाँ चौक, पुरानो बजार देशीलाईन हुँदै पुनः भानुचौकमा आएर समापन हुनेछ ।