धरान  : कोशी प्रदेश पर्यटन वर्ष समितिले अन्तरप्रदेशीय पर्यटन सहकार्यलाई सुदृढ बनाउन गण्डकी प्रदेश, मधेस प्रदेश र चितवनमा विशेष कार्यक्रम सञ्चालन गर्ने तयारी गरेको छ। सो उद्देश्यका साथ आइतबार कोशी प्रदेशका वन, वातावरण तथा पर्यटन मन्त्री माननीय भीम पराजुलीको नेतृत्वमा उच्चस्तरीय टोली गण्डकी प्रदेशको पोखरा पुगेको कोशी प्रदेश पर्यटन वर्ष समितिका सदस्य वासुदेव बरालले जानकारी दिए।
आइतबार नै गण्डकी प्रदेशको उद्योग तथा पर्यटन मन्त्रालयका प्रतिनिधि तथा निजी क्षेत्रका पर्यटन व्यवसायीहरूसँग सहकार्य र द्विपक्षीय सम्झौताबारे अनौपचारिक तर महत्वपूर्ण छलफल सम्पन्न भएको बरालले बताए।
उक्त छलफलमा कोशी प्रदेशका सचिव इन्द्र सापकोटा, मुख्यमन्त्रीका आर्थिक सल्लाहकार मोहन सुवेदी, नेपाल पर्यटन बोर्डका निर्देशक रोहिणी खनाल, पोखरा पर्यटन परिषद्का अध्यक्ष तारानाथ पहारी, पर्यटन वर्ष समितिका सह–संयोजक तथा गण्डकी प्रदेशका प्रमुख पर्यटन व्यवसायीहरूको सहभागिता रहेको थियो।
छलफलमा कोशी र गण्डकी प्रदेशबीच हवाई तथा स्थलीय यातायात कनेक्टिभिटी सुदृढ गर्ने, पर्यटकीय गन्तव्यहरूको संयुक्त प्रवर्द्धन गर्ने, धार्मिक गन्तव्य, पदमार्ग, साहसिक पर्यटन र होमस्टे पर्यटनका क्षेत्र विस्तार गर्ने विषयमा सकारात्मक सहमति बनेको बरालले जानकारी दिए। साथै व्यावसायिक साझेदारी, अनुभव आदान–प्रदान र एकीकृत विकास कार्यक्रम मार्फत दुवै प्रदेशको पर्यटन सम्भावनालाई अधिकतम उपयोग गर्ने तयारी भइरहेको समेत उनले बताए।