_1749430366.gif)
धरान : नेकपा एमालेको पार्टी चुनावमा जनताले मत दिएर कोशी प्रदेश सभा सदस्यमा विजयी गराएका सांसदव्दय पराजित भएका छन् । यसलाई जनताले मत दिए पनि पार्टीका सङ्गठित सदस्यहरूबाट विश्वास गुमेको मानिएको छ ।
एमालेको ११ औँ महाधिवेशनका लागि सुनसरी-१ बाट प्रतिनिधि चयनकालागि भएको आन्तरिक चुनावमा सुनसरी-१ बाटै कोशी प्रदेश सभाको चुनावमा विजयी एमाले सांसदव्दय रमेश बस्नेत र विजय कुमार राई पराजित हुन ।
बस्नेत र राईलाई २०७९ सालमा धरान सुनसरी–१ बाट प्रदेश सभा ‘क’ र ‘ख’ बाट जनताले जिताएका थिए । जनताले जिताएका उनीहरूलाई पार्टीको सङ्गठित सदस्यहरूले मत दिने आन्तरिक चुनावमा पराजित गराइएको हो ।
महाधिवेशन प्रतिनिधिका लागि शनिवार धरानमा भएको निर्वाचनमा दुवैले निराशाजनक मत पाए । विजय कुमार राईले ३९१ मत र रमेश बस्नेतले ३७६ मत प्राप्त गरेका । धरानको ३ मतदान केन्द्रमा १ हजार ७७१ मध्ये ९६६ ले मतदान गरेका थिए ।
सुनसरी-१ क बाट प्रदेश सभामा निर्वाचित रमेश कुमार बस्नेतले काँग्रेस-माओवादी गठबन्धनका उम्मेदवार नेपाली काँग्रेसका उमेश थापालाई पराजित गरेका थिए । उनी आफ्नै पार्टीको चुनावमा भने पराजित भए ।
सुनसरी–१ ख बाट प्रदेश सभा सदस्यमा निर्वाचित विजयकुमार राई गठबन्धनका अर्का उम्मेदवार नेकपा एकीकृत समाजवादीका रेवतीरमण राईलाई फराकिलो मतले पराजित गरी निर्वाचित भएका थिए । उनी पनि पार्टी चुनावमा पराजित भए।
सांसद द्वयको पार्टी चुनावमा पराजयको कारण एमाले भित्रको गुटबन्दीको परिणाम भएको स्थानीय कार्यकर्ताहरूले बताएका छन् । प्रतिनिधि सहमतिमै छान्ने प्रयास भए पनि सहमति नजुटेपछि बढेको विवादले कुटपिटको घटना समेत भएको थियो ।
पार्टी चुनावको नतिजा अनुसार खुल्ला तर्फ आसाराम चौधरी, जयकुमार राई र मुरारी सुवेदी निर्वाचित भएका छन् । प्रतिनिधि छनौटका लागि भएको मतदानमा ७९६ मत सुवेदीले ७७६ मत जयकुमारले ६७४ मत पाएर चौधरी निर्वाचित भएका हुन । निर्वाचित मुरारी, ओली पक्षधर हुन भने चौधरी र राई इतर पक्षका हुन ।
महिलातर्फ सीता भण्डारी पौडेल र सुशीला पहाडी ढकाल निर्वाचित भएका छन् । उनीहरू ओली इतर पक्षका हुन । युवातर्फ दिवस वान्तता राई निर्वाचित भएका छन् । उनी कोशी प्रदेशका मुख्यमन्त्री हिक्मतकुमार कार्कीका जनसम्पर्क सल्लाहकार रवि खनाल र पूर्वमुख्यमन्त्री भीम आचार्यका स्वकीय सचिव अनिल राजधामीलाई पराजित गर्दै विजयी भएका हुन ।
एमाले महाधिवेशनका लागि सुनसरी-१ बाट प्रतिनिधि छनौटका लागि धरानमा निर्वाचन भएको थियो भने मतदानमा ४५ दशमलव ४५ प्रतिशत मात्र मत खसेको थियो ।
