धरान : नेकपा एमालेको ११ औँ महाधिवेशनका लागि सुनसरी–१ धरानमा भएको प्रतिनिधि चयन मतदानमा ४५ दशमलव ४५ प्रतिशत मतदाता सङ्गठित सदस्य सहभागी भएनन् ।
यसलाई ओली पक्षधरको एकल गुटबन्दीप्रति असन्तुष्टिको सङ्केत भएको स्थानीय एमाले कार्यकर्ताले अर्थ्याएको पाइएको छ ।
कार्यकर्ता तहसम्म पुगेका सङ्गठित सदस्य मतदानमा सहभागी नहुनु दुर्भाग्यपूर्ण भएको एमाले निकट स्रोतले बतायो ।
प्रतिनिधि चयनकोलागि धरानमा कायम ३ मतदान केन्द्रका १ हजार ७७१ मध्ये ९६६ ले मात्र मतदान गरेका मतदान अधिकृत भोला श्रेष्ठले जानकारी दिए ।
धरान-१ स्थित पार्टी कार्यालय,वडा १८ समिति र वडा १५ मिलन चोकमा शनिवार मतदान भएको हो । 
श्रेष्ठले धरानमा कुल ८०५ मत नखसेको बताए। मतदान प्रक्रियामा कुनै विवाद भने भएन ।
सुनसरीका विभिन्न केन्द्रबाट मतपेटिका आज साँझ इनरुवा लैजाने र मतगणना राति ८ बजेदेखि सुरु हुने उनले बताए ।
परिणाम भोलिसम्म सार्वजनिक हुने श्रेष्ठको भनाई छ ।मतदानको पूर्व सन्ध्या धरानमा गुटीय तनाव कुटपिट सम्म पुगेको थियो ।
ईश्वर पोखरेल समूहका अनिल राज धामीमाथि कुटपिट भएको घटनाले एमालेमा स्थानीय तह देखी नै विभाजन तीव्र बनेको देखिएको छ । 
मतदान अधिकार सङ्गठित सदस्यहरूलाई मात्र रहने व्यवस्था भएको पार्टीमा मतदानमै सहभागी नहुनु राम्रो सङ्केत नभएको एमाले कार्यकर्ताहरूको भनाई छ । 
matganna