धरान : नशा सम्बन्धी रोगीहरूको उपचारका लागि धनकुटा-धरान एकता समाजले फागुन २७ गते शनिवार धरान–१२ स्थित पब्लिक हाई स्कुलमा विशेषज्ञ डाक्टरहरू सहितको निःशुल्क स्वास्थ्य परीक्षण शिविर आयोजना गर्ने भएको छ । 
समाजका अध्यक्ष गङ्गाप्रसाद रेग्मीका अनुसार अस्पताल सम्म पहुँच नभएका, नशा रोग सम्बन्धी सचेतना नभएका रोगीहरूका लागि सहज रूपमा स्वास्थ्य परीक्षण, उपचारका लागि परामर्शको सुविधा प्रदान गर्न शिविर आयोजना गरिएको हो । शिविरमा बिपी कोइराला स्वास्थ्य विज्ञान प्रतिष्ठानमा कार्यरत विशेषज्ञ चिकित्सक न्युरोलोजिष्टहरुबाट परीक्षण गरिने उनले बताए । 
समाजका सचिव राजु थापाका अनुसार शिविरमा न्युरो फिजिशियन डा.भूपेन्द्र साह, न्युरो सर्जन डा.आलोक दाहाल, न्युरो साइकियट्रिक्स डा.सञ्जीवकुमार मिश्र र जनरल फिजिसियन फेलोसिप इन डाइबेटिज डा.अजय यादवले बिरामीहरूको स्वास्थ्य जाँच गर्ने प्रबन्ध मिलाइएको छ ।
शिविरमा हड्डी खिएर, नशा च्यापिएर समस्यामा रहेका बिरामीहरूको परीक्षण तथा उचित उपचारको परामर्श प्रदान गर्ने उनले बताए । हाडको ट्युमर, दुर्घटनामा भएको स्पाइनलकर्ड इञ्जुरीका बिरामीहरूको स्वास्थ्योपचारका लागि पनि परीक्षण, परामर्श सेवा प्रदान गरिने छ । टाउको दुख्ने, छारे रोग, शरीर काम्ने र सम्झाउने बिरामीहरूको पनि शिविरमा परीक्षण गरिने बताइएको छ ।
समाज सामाजिक संस्था भएकाले धरान लगायत बाहिरबाट आउने सबै नशाका बिरामीहरूलाई समान रूपमा परीक्षणको सुविधा प्रदान गरिने छ । शिविर बिहान ९ बजे सुरु भई दिउँसो ३ बजे सम्म सञ्चालन हुनेछ ।