• शुकदेव चौधरी 
इनरुवा : ७३ औँ प्रजातन्त्र दिवसको अवसरमा सदरमुकाम इनरुवामा पहिलो पटक चार सय बढी धावकहरूको सहभागितामा आइतबार प्रथम इनरुवा रन सम्पन्न भएको छ । 
इनरुवा नगरपालिकाको सहयोग तथा इनरुवा इभेन्ट म्यानेजमेन्ट आयोजनामा सम्पन्न भएको प्रथम इनरुवा रन इनरुवा-९ स्थित वीपी चौक देखि इनरुवा-३ स्थित मदन भण्डारीको चौक सम्म ४ किलोमिटरको दौड प्रतियोगिता गरिएको हो । 
उक्त रनमा नेपाल प्रहरीका किरण लिम्बुले प्रथम स्थान हासिल गर्न सफल भएका छन । त्यसैगरी भिया लिम्बु द्वितीय, प्रशान्त तामाङ तृतीय स्थान प्राप्त गर्न सफल भए । उक्त दौड प्रतियोगितामा उत्कृष्ट १० मा कौशल राई, सरोज सिंह, अमर यादव, सरोज लिम्बु, नवीन गुरुङ, विजय राई र विश्व जोशी सहितका पुरस्कृत भएको आयोजक इनरुवा इभेन्ट म्यानेजमेन्टका अध्यक्ष सञ्जय मेहताले जानकार दिए ।
सोही दौडमा महिला तर्फ रिक्की लिम्बु पहिलो स्थान प्राप्त गर्न सफल भइन । प्रथम सहित टप टेनलाई इनरुवा नगरपालिकाका प्रमुख केदार भण्डारीले नगद, साइकल सिल्ड र प्रमाण पत्र वितरण गरेका थिए । 
प्रमुख भण्डारीले इनरुवाको पहिचान र खेलकुदको विकास, शारीरिक तथा मानसिक विकासका लागि आफूले पहिलो पटक प्रथम इनरुवा दौड प्रतियोगिताको आयोजना गरेको र चार सय बढी धावकहरू सहभागी भएकोमा खुसी व्यक्त गरेका थिए । भण्डारीले उपाधि सहित पहिलो र टपटेनमा पर्न सफल भएकाहरूलाई बधाई सहित प्रजातन्त्र दिवसको अवसरमा शुभकामना समेत व्यक्त गरे ।  
प्रतियोगीहरूलाई हौसला प्रदान गर्नका लागि जिल्ला समन्वय समितिका प्रमुख राजन मेहता, इनरुवा नगरपालिकाका प्रमुख केदार भण्डारी, नेपाली काग्रेंसका केन्द्रीय सदस्य राजीव कोइराला, पूर्व राज्यमन्त्री सिताराम मेहता, सशस्त्र प्रहरी उपरीक्षक, जिल्ला अस्पतालका प्रमुख डा. देवराज घिमिरे, इनरुवा नगरपालिकाका प्रमुख प्रशासकीय अधिकृत दशरथ राई सहित ४१० जना धावकहरू दौड प्रतियोगितामा सहभागिता रहेको थियो ।