_1749430366.gif)
धरान : धरानमा जेनजीको नाममा भाटभटेनी डिपार्टमेन्ट बाहेकका ठाउँमा भएको तोडफोड, लुटपाट र आगजनी गरिँदा ५ करोड रुपैयाँ बराबरको क्षति भएको छ ।
इलाका प्रहरी कार्यालय धरानमा आज आईतबार सम्म किटानी जाहेरी दर्ता गर्नेहरूको सङ्ख्या १२ जना पुगेको छ । डिएसपी प्रकाश जवेगुका अनुसार १२ जना निवेदकहरूले करिब ५ करोड बराबरको क्षति विवरण बुझाएका छन् ।
किटानी जाहेरीमा जेनजीको नाममा तोडफोड, लुटपाट र आगजनीको अपराधमा संलग्न हुने हालसम्म २५ जनाको नाम उल्लेख छ । घट्नामा संलग्नहरूको नाम भने सार्वजनिक गरिएको छैन । नेपाली काँग्रेस धरानले आज आइतबार दिएको जाहेरी १७ जनाको नाम किटानी गरिएको छ । २० लाख ४७ हजार क्षतिपूर्ति दाबी गरेको छ ।
नेकपा एमालेले ५ जना विरुद्ध किटानी जाहेरी र ५० जना संलग्न रहेको निवेदन दिएको छ । क्षतिपूर्ति २० लाख रुपैयाँ बराबरको विवरण बुझाएको छ । नेकपा माओवादीले २० जना विरुद्ध किटानी जाहेरी दिएको छ ।आक्रमणमा ४० जना संलग्न रहेको सूचि सहित निवेदन दिएको छ । क्षतिपूर्तिका लागि ४१ लाख २९ हजार क्षति विवरण बुझाएको छ ।
प्रहरीमा हाल सम्म जाहेरी दिनेहरूमा धरान उपमहानगरपालिकाका पूर्व नगरप्रमुख मनोज मेन्याङवो, निवर्तमान उपमेयर मञ्जु भण्डारी, एमाले नेता मुरारी सुवेदी, पुर्वसांसद जयकुमार राई, कार्यपालिका सदस्य सिर्जना नेपाल छन् ।
यस्तै नेपाली काँग्रेसका कोशी प्रदेश महामन्त्री उमेश थापा, काँग्रेस सुनसरी क्षेत्र १ का सभापति सुजेन्द्र गोले तामाङ र निवर्तमान उपमेयर भण्डारीको घरमा डेरा गरी बस्ने सुनिता पोखरेल, नेपाली काँग्रेस धरान, नेकपा एमाले धरान, नेकपा माओवादी केन्द्र धरान छन् ।
इलाका प्रहरी प्रमुख डिएसपी जबेगुले उजुरीकर्ताहरूका घटनाको सुक्ष्म ढङ्गले खोज अनुसन्धान भईरहेको बताए । घटनामा संलग्न व्यक्तिहरूको नाम किटान गरी जाहेरी भई सकेतापनि तालुकवाला कार्यालयबाट निर्देशन नआएकाले कारबाही प्रक्रिया अगाडी बढाउन ढिलाई भएको उनको भनाई छ ।
उनले भने ‘माथिबाट आदेश आएपछि कारबाही प्रक्रिया तुरुन्त सुरु गछौं, घटनामा संलग्न कोही दोषी उम्कन पाउदैनन र उन्मुत्ती पाउदैनन, ढुक्क हुनुस् । कारबाही प्रक्रिया अगाडी बढ्छ ।’
यसअघि होटेल कञ्चनजङ्घामा भएको तोडफोड, लुटपाट र आगजनीको घट्नामा संलग्न १३ जनाको नाम किटान गरी सञ्चालक तथा धरानका पूर्व मेयर मनोजकुमार मेन्याङबोले मङ्गलवार इलाका प्रहरीमा जाहेरी दर्ता गराएका थिए । ६७ लाख बराबरको क्षति विवरण बुझाएका थिए । होटेलबाट ६ लाख रुपैयाँ नगद समेत लुटिएको थियो ।
जाहेरी दिन काँग्रेस, एमाले नेता,कार्यकर्ताहरू सहित ठुलो सङ्ख्यामा इलाका प्रहरी कार्यालय पुगेका थिए । नेकपा माओवादी केन्द्र धरान अध्यक्ष उद्धव लिम्बुले भने ‘आन्दोलनको बेला राजनीतिक दलले धरानमा प्रतिकार गरेको भए ठुलो दुर्घटना हुन्थ्यो, दलहरूले संयममता अपनाएको कारण ठुलो दुर्घटना हुनबाट धरान बचेको हो ।’
