धरान : धरान वडा नं. २० बिष्णुपादुकाबासी विरुद्ध जाहेरी दिन मेयर हर्क साम्पाङ समर्थकहरू इलाका प्रहरी कार्यालय पुगेका छन्। 
मेयर साम्पाङका स्वकीय सचिव सुदर्शन लिम्बु, उनका सहयोगी समीर तामाङ सहितको टोली इलाका प्रहरी कार्यालय पुगेका हुन ।
शनिवार कोकाहमा दोस्रो पाइप बिस्तार गर्न श्रमदाता समूहसँग मेयर साम्पाङ धरान वडा नं. २० को ज्यामिरे भन्ने ठाउँमा पुगेका थिए । दोस्रो पाइपबाट पानी लैजाँदा स्थानीयलाई पानीको सङ्कट हुने भनी असन्तुष्ट जनता त्यहाँ जम्मा भएका थिए ।
स्थानियबासी र मेयर साम्पाङ सँग गएका श्रमदाताहरू बिच विवाद बढेर हात हालाहालको स्थिति सृजना भएको र साम्पाङका केही सर्मथकहरु सामान्य घाइते भएको प्रत्यक्षदर्शीहरुले बताएका थिए ।
सोही घटनामा धरान-११ का १८ वर्षीय लोकेन्द्र लिम्बु घाइते भएको भन्दै साम्पाङ सर्मथकहरु इलाका प्रहरी कार्यालय पुगेका हुन । 
इलाका प्रहरी कार्यालय धरानका प्रहरी नायब उपरीक्षक मानबहादुर राईले उजुरी आएको र आवश्यक कारबाही सुरु गरिएको जानकारी दिए ।
घाइते भनिएका लोकेन्द्र लिम्बुलाई ५-७ जनाले कुटपिट गरी घाइते बनाएको इलाका प्रहरी कार्यालयमा भेटिएका मेयरका एक समर्थकले जानकारी दिए । 
कुटपिटमा संलग्नहरूको यकिन पहिचान नभएकोले घटनास्थलको फोटो तथा भिडियो हेरेर पहिचान गरिने प्रहरी नायब उपरीक्षक राईले बताए।