धरान : वीपी कोइराला स्वास्थ्य विज्ञान प्रतिष्ठानको दक्षिण तर्फको प्रवेशद्वार भत्काउन प्रयोग गरिएको डोजर मालिक प्रदीप क्षेत्री र अपरेटर उदिम खड्कालाई छुटाउन माओवादी वडा १९ का नेताहरूले वीपी प्रतिष्ठानसँग गेट पूनःनिर्माण गर्ने प्रतिबद्धता जनाउँदै लिखित माफी मागेका छन् ।
प्रवेशद्वार भत्काएको घट्नामा क्षेत्री र खड्कालाई प्रहरीले पक्राउ गरेपछि गेट भत्काउन लगाउने नेकपा माओवादी केन्द्र वडा १९ कमिटीका नेता सन्तोष लिम्बु र सन्त थेम्बे र वीपी प्रतिष्ठानका अस्पताल निर्देशक डा.जगतनारायण प्रसाद र उपनिर्देशक डा.इन्द्र लिम्बु बिच भएको छलफलमा गल्ती स्वीकार गर्दै लिखित माफी मागेका हुन् ।
गत ४ महिना अघि देखि माओवादी केन्द्रले जनतासँग माओवादी विशेष रूपान्तरण अभियान कार्यक्रममा माओवादी वडा १९ कमिटीले प्रतिष्ठान प्रवेश गर्ने दक्षिण पुरानो बाटोको गेट खोल्न माग गरेको थियो ।
स्थानिय समुदायको माग रहेको भन्दै पार्टीमा प्रस्तुत गरेको प्रस्तावलाई आधार बनाएर उनीहरूले एक्स्काभेटर समेत ल्याएर गेट भत्काएका थिए ।
सोमवार प्रहरीले गेट भत्काएको घट्नामा पक्राउ गरिएका दुवैलाई कानुनी कारबाही गर्न म्याद थपका लागि अदालत लैजान लाग्दा इलाका प्रहरी कार्यालय गेटमा माओवादीका नेता, कार्यकर्ता सहित वडा १९ का समुदायले म्याद थप गर्न लैजान नदिन अवरोध गरेका थिए ।
प्रहरीले बल प्रयोग गरेर भिडलाई हटाए पछि मात्र थुनुवा बोकेको गाडी म्याद थप गर्न हिँडेको थियो । माओवादी नेता सन्तोष लिम्बुको नेतृत्वमा आएको टोलीले चालक र मालिक निर्दोष भएकोले छोड्नुपर्ने माग गरेका थिए ।
अवरोध गर्ने क्रममा प्रहरीले लिम्बुलाई केहीबेर नियन्त्रणमा लिएर छोडेको थियो ।
