धरान : इलाका प्रहरी कार्यालय धरानको सादा पोसाकमा खटिएका प्रहरीले ब्राउनसुगर र अन्य लागुऔषध सहित धरानका एक जना युवालाई बुधवार पक्राउ गरेको छ । यसैगरी इटहरी र उदयपुरका दुई जना युवा लागुऔषध सहित पक्राउ परेको परेको कोशी प्रदेश प्रहरी कार्यालय विराटनगरले जनाएको छ ।
धरानमा पक्राउ परेका युवा धरान-१५ का २७ वर्षीय जेल्स राई छन् । उनलाई इलाका प्रहरी कार्यालय धरानबाट सादा पोसाकमा खटिएको प्रहरी टोलीले पक्राउ गरेको हो । राईको कोठाबाट ३ ग्राम ब्राउन सुगर साथै ट्रामाडोल, स्पास्पेइन ८० ट्याब्लेट बरामद भएको छ ।कोठाबाट नगद  ६० हजार ३ सय ५ रुपैयाँ पनि फेला परेको प्रहरीले जनाएको छ । पक्राउ परेका राईलाई थप अनुसन्धानका लागि नियन्त्रणमा लिइएको छ ।
यसैगरी लागुऔषध नियन्त्रण ब्युरो विराटनगरबाट खटिएको प्रहरी टोलीले उदयपुर चौदण्डिगढी-२ का २९ वर्षीय उमेश खत्री र इटहरी-५ का २८ वर्षीय वसन्त तोलाङ्गीलाई २ ग्राम ९३ मिलिग्राम ब्राउन सुगर, नगद १८ हजार रुपैयाँ सहित पक्राउ गरेको छ ।
उनीहरू विराटनगर-१५ स्थित नेपाल-भारत सिम क्षेत्रमा भारतबाट को ३९ प ८७१५ नम्बरको मोटरसाइकलमा आउँदै थिए । प्रहरी टोलीलाई शङ्का लागि चेकजाँच गर्दा लागुऔषध ब्राउन सुगर बरामद भएको प्रहरीले जनाएको छ ।