धरान : आइतबार बिहानै देखि धरान उपमहानगर कार्यालय परिसरमा स्थानीयको बाक्लो उपस्थिति थियो । पानी झरीमा छाता र प्ले कार्ड बोकेर करिब ३ सय जनाले उपमहानगर विरुद्ध नारा लगाइरहेका थिए । उनीहरू थिए बराह बचत पीडित ( बराहमा जम्मा गरेको आफ्नो रकम झिक्न नपाएकाहरू) । पटक पटकको आन्दोलनले आक्रोशित भिडले नगर प्रमुख र उपप्रमुख खोजिरहेको थियो । तर  दिनको २ बजिसक्दा पनि दुवै जना उपस्थित नभएपछि नगर परिसर मात्रै हैन भित्री कार्यालय समेत अशान्त बन्दै गयो । बल्लतल्ल नगर प्रमुख हर्कराज राई आए तर आन्दोलनरत पक्षको मागमा खासै चासो देखाएनन् । उनले पीडित पक्षलाई मैलेँ बराहमा पैसा राख्न भनेको थियो र ? भन्दै गैर जिम्मेवार पूर्वक जवाफ दिए । 
यही शब्दले भिडलाई उग्र बनायो । आन्दोलनकारीले हर्क साम्पाङ मुर्दावादको नारा मात्रै लगाएनन् । प्रमुख बस्ने कार्यकक्षको सिसाको झ्याल समेत फुटाइदिए । भिड अनियन्त्रित हुँदै गएपछि प्रहरीले आन्दोलनकारीलाई लाठीचार्ज समेत गरेको थियो ।
jhyal-mayarभएको सम्पत्ति जोगाउन हारगुहार
बराह पीडित संर्घष समितिले महिनौँ अगाडी देखि आन्दोलन गर्दै आएको छ । उनीहरूले बराह सहकारीको भएको स्वामित्व सार्वजनिक गर्नु पर्ने, सञ्चालक समितिमा रहेका पदाधिकारीको सम्पत्ति रोक्का हुनु पर्ने जस्ता माग राख्दै सहकारी विभाग काठमाण्डौं, प्रदेश सरकार समक्ष धाइसकेका छन् । तर ती दुवै निकायले यो काम धरान उपमहानगरको हो भन्दै आएको छ । जसका कारण स्थानीय सरकार समक्ष पीडित पक्ष आन्दोलनमा आएका हुन् ।